بەروار: 16/03/2026
پەیامی سەرپەرشتیاری ئیدارەی گەرمیان لەیادی کیمیاییبارانکردنی هەڵەبجەدا لەیادی ٣٨ ساڵەی تاوانی گەورەی کیمیاییبارانکردنی شاری هەڵەبجەدا، بەناوی ئیدارەی گەرمیانەوە ئیدانە و مەحکومی ئەم تاوانە قێزەونەی رژێمی بەعس دەکەین و سەری رێز بۆ شەهیدانی هەڵەبجە دادەنوێنین و هاوخەمی خۆمان دوپاتدەکەینەوە. لە رۆژی ١٦ی ئازاری ١٩٨٨، رژێمی بەعسی فاشیزم، بە چەکی کیمیاویی قەدەغەکراو، شاری هەڵەبجەی بۆردومان کرد و تاوانی گەورەی سەردەمی دەرهەق بە گەلی کوردی ئاشتیخواز ئەنجامدا، لەئاکامی ئەم تاوانە گەورەدا، پێنج هەزار هاوڵاتی بێ تاوانی شارەکە شەهید بوون و هەزارنی تر بریندار بوون، لەچرکە ساتێکدا هەڵەبجە بە تەواوی خاپورکرا و سەرچاوەکانی ژیانی تێدا ووشک بوو، دیارە لەهەمان ساڵدا رژێمی بەعس پلانی هەبوو لەڕێگەی شاڵاوەکانی ئەنفالەوە گەلی کورد بە یەکجاری بسڕێتەوە و لە گەرمیان بەتایبەتی و ناوچەکانی دیکەی کوردستان بەگشتی ١٨٢ هەزار هاوڵاتی سڤیل بەر پرۆسەی ئەنفال کەوتن و پێنج هەزار گوند روخێنران. لەیادی ٣٨ ساڵەی تاوانی کیمیابارانکردنی هەڵەبجەدا، داواکارین حکومەتی عێراق وەک میراتگری حکومەتی پێشووتری خۆی، قەرەبووی خەڵکی هەڵەبجە بکاتەوە و بەهەوڵی هەمەلایەنە کار بکرێت بۆ ئەوەی کۆمەڵگەی نێودەوڵەتیی ووڵاتەکەمان بپارێزێت لەوەی جارێکی تر رووبەڕوی جینۆساید ببێتەوە. رۆحی بەرزەفڕی شەهیدانی هەڵەبجە و کوردستان شاد و مردن بۆ دوژمنانی گەلەکەمان. جەلال شێخ نوری سەرپەرشتیاری ئیدارەی گەرمیان ٢٠٢٦/٣/١٦