بەروار: 12/02/2026
بە ئامادەبوونی سەرپەرشتیاری ئیدارەی گەرمیان فستیڤاڵی دایک بۆ زانست و هونەر لەقەزای کفری بەرێوەچوو. ئەمڕۆ بە ئامادەبوونی سەرپەرشتیاری ئیدارەی گەرمیان و قایمقامی قەزای کفری و بەرێوەبەری گشتی پەروەردەی گەرمیان و بەرێوەبەری پەروەردەی کفری و بەرێوەبەری فەرمانگەکانی قەزاکە و مامۆستایان خوێندکاران فستیڤاڵی دایک بۆ زانست و هونەر لە ئامادەیی کفری تێکەڵ بەڕێوەچوو. لەفستیڤاڵەکەدا، بەرێز سەرپەرشتیاری ئیدارەی گەرمیان وتارێکی پێشکەشکرد و وێرای دەستخۆشی لە بەرێوەبەرایەتی پەروەردەی کفری، ئاماژەی بەگرنگی ئەم چالاکییانەکرد و ڕایگەیاند پشتیوانی تەواوی بەرێوەبەرایەتی گشتی پەروەردەی گەرمیان و پەروەردەی کفری دەبین، لە بەرەوپێش بردنی کەرتی پەروەردە لەڕووی پەروەردەیی و زانستی و هونەرییەوە، چەند بڕگەیەکی فستیڤالەکەشی بە پشتگیرییەکی گەورە و جوانی ڕۆژئاوای کوردستان وەسفکرد. دواتر و لە فستیڤالەکەدا بەڕێوەبەری پەروەردەی کفری وتارێکی پێشکەشکرد و تێیدا سوپاسی سەرپەرشتیاری ئیدارەی گەرمیان و قایمقامی قەزای کفری کرد لە پشتیوانی بەردەوامیان بۆ پێشخستنی کەرتی پەروەردە. دواتر چەندین برگەی هونەری و میوزیک لەلایەن خوێندکارانی خوێندگا و باخچەکانەوە بەڕێوەچوون، هاوکات لە کۆشکەکانی فستیڤاڵەکەدا چەندین بەرهەمی زانستی و کلتوری و هونەری نمایشکران. فستیڤالی دایک لە قەزای کفری لە لایەن ئامادەیی کفری بە هەماهەنگی بەرێوەبەرایەتی پەروەردەی کفری و بە پشتگیری ڕێکخراوی هاوکاری ئەلمانی بەڕێوەچوو.