ئەمڕۆ (٢٧ی ئایاری ٢٠٢٥) جەلال شێخ نوری سەرپەرشتیاری ئیدارەی گەرمیان، بە ئامادەبوونی جێگری سەرپەرشتیار بۆ کاروباری هونەری، پێشوازیکرد لە کونسوڵی گشتی بەڕیتانیا لە هەولێر و شاندی یاوەری.

لەو سەردانەدا، ئاندرۆ بیزڵی، کونسوڵی گشتی بەڕیتانیا لە هەولێر ئەوەی خستەڕوو، ئەمڕۆ بەمەبەستی لە نزیکەوە ئاشنابوون بە ناوچەی گەرمیان و بەسەرکردنەوەی پرۆژەی چاککردنەوەی ئاودێری باڵەجۆ کە لەسەر ئەرکی حکومەتی بەڕیتانیا لەلایەن رێکخراوی (IOM) تەواوکراوە سەردانەکەی بۆ گەرمیان ئەنجامداوە.

ووتیشی، ئەوەی لە سەردانەکەمان بینیومانە کەلار شارێکی جوان و گەشەسەندووە و جوڵەی ئاوەدانی و بەرەوپێشچوونی زۆر باشی تێدا بەدیدەکرێت، ئەمەش جێگەی دەستخۆشییە.

لەبەرامبەردا، جەلال شێخ نوری، سەرپەرشتیاری ئیدارەی گەرمیان باسی لە ئیدارەی گەرمیان و کار و پرژەکانی سنورەکە کرد، ئەوەی راگەیاند، گەرمیان ئیدارەیەکی سەربەخۆیە، لە ساڵی ٢٠٠٦ وە وەک یەکەم ئیدارەی سەربەخۆ لەهەرێمی کوردستاندا دامەزراوە، سەرجەم بەڕێوەبەرایەتی گشتی و بەڕێوەبەرایەتی ئاسایی هاوشێوەی پارێزگاکانی تری تێدایە، ئیدارەکەمان رۆڵی هەبووە لە کار ئاسانی بۆ هاوڵاتیان و خزمەتی باشتری سنورەکە، هەر ئەمەش وایکردوە حکومەتی هەرێم لە ناوچەکانی دیکەی هەرێم ئیدارەی سەربەخۆ بهێنێتە کایەوە.

دواتر، سەرپەرشتیاری ئیدارەی گەرمیان رایگەیاند گەرمیان لە پرۆسەی جینۆسیادی ئەنفالدا زۆرترین قوربانی داوە و هەموو گوندەکانی خاپور کراون بەڵام توانیمانە خزمەتگوزاری پێویستی وەک ئاو و کارەبا و رێگاوبان و قوتابخانە بگەیەنینە گوندەکان، هاوکات، تیشکی خستەسەر ئەوەی لە رووی ئەمنیەوە گەرمیان ناوچەیەکی پارێزراوە و لەرووی جوگرافیەوە پێگەیەکی بەهێزی هەیە ئەمەش وایکردووە لە هەموو رویەکەوە گەشەکردن بەخۆوە ببینێت، بەتایبەت لە رووی بازرگانی و کشتوکاڵی و پیشەسازی و وەبەرهێنانەوە.

هەر لە درێژەی دیدارەکەدا، سەرپەرشتیاری ئیدارەی گەرمیان سوپاسی حکومەتی بەڕیتانیای کرد لەبەرامبەر ئەنجامدانی پرۆژەی چاککردنەوەی ئاوی باڵەجۆ لە سنوری ناحیەی قۆرەتوو، هاوکات لە دیدارەکەدا، باس لە مەترسیەکانی گۆرانی کەشوهەوا و دیاردەی کۆچی نایاسایی کرا و جەختکرایەوە لەبەگەڕ خستنی هەوڵی هەمەلایەنە و پلانی پێویست بۆ بەرەنگاربونەوەی زیانەکانی گۆڕانی کەشوهەوا و کۆچی نایاسایی لە گەرمیان.

لە کۆتایی دیدارەکەدا، سەرپەرشتیاری ئیدارەی گەرمیان، وێنەی قەڵا شێروانە و سەرای کفری پێشکەش بە کونسوڵی گشتی بەڕیتانیا لە هەولێر کرد.