ئیوارەی ئەمڕۆ (۲٠ی ئازار) بە ئامادبوونی سەرپەرشتیاری ئیدارەی گەرمیان و قایمقامی قەزای کەلار و بەرپرسی یەکەمی حزبەکان لە گەرمیان و ژمارەیەک لە بەڕێوەبەری فەرمانگەکان و ژمارەیەکی بەرچاو لە هاوڵاتیان، لە رێورەسمێکدا ئاگری نەورۆز لەسەر قەڵای شێروانە لە شاری کەلاری ناوەندی ئیدارەی گەرمیان کرایەوە و ئاهەنگ و چالاکی هونەری بەڕێوەچوو.

لە مەراسیمەکەدا، سەڵاح کوێخا سەرپەرشتیاری ئیدارەی گەرمیان ووتەیەکی پێشکەكردوو تیایدا پیرۆزبایی جەژنی نەورۆز و سەری ساڵی نوێی کوردی ئاراستەی هاوڵاتیان و چین و توێژە جیاوازەکان و هێزەکانی پێشمەرگە کرد لە سەنگەرەکانی بەرگری.

ووتیشی: هیوا دەخوازین جەژنی نەورۆز ببێتە هەوێنی ئاشتی وتەبایی نێوان لایەنە سیاسییەکانی هەرێم و وەک چۆن بەرپرسی حزبەکان ئەمڕۆ لەگەرمیان دەست لەناو دەست ئاگری نەورۆزیان هەڵکرد، لە ئاستی باڵاش بە دانیشتن و گفتوگۆ سەرجەم و کێشەو قەیرانەکانی هەرێم چارەسەر بکەن لە پێناو بەرژەوەندیی گشتی.

سەرپەرشتیاری ئیدارەی گەرمیان راشیگەیاند: ئەمڕۆ هەموو لێرە کۆبوینەتەوە و بە ئازادی ئاگری نەورۆز دەکەینەوە، ئازادیمان دەستکەوتی خوێنی شەهیدانە و هیز و ماندووبونی پێشمەرگەیە.

لە ووتەکەیدا سەڵاح کوێخا سوپاسی قایمقامی قەزای کەلار و قایمقامی قەزای کفری و بەڕێوەبەرایەتییە گشتیەکانی گەشت و گوزار و رۆشنبیری هونەر و شارەوانییەکان و سەرجەم دەزگا ئەمنییەکان و بەڕێوەبەرایەتییەکان و کەس و لایەنەکانی کرد کە بۆ سازدانی ئاهەنگەکە ماندوو بوون.

دواتر، بە بەشداری ژمارەیەک هونەرمەند و گروپی هەڵپەرکێ ئاهەنگی نەورۆز بەڕێوەچوو.